Membaca Nyaring

Membaca Nyaring

GAMELAN KAGEM JAMU AWET NEM 

  Gamelan punika tembung ngoko, kramanipun gangsa lan kawinipun pradangga. Gangsa  sajatosipun  tembung  tjamboran-wantjahan,  jangkepipun  mungel: temba ga + radja sa. Tembaga lan radjasa punika wastane pelikan (logam), dicampur lan diluluh, dipundamel gamelan. Tembung gasa (tembaga + radjasa), pengucap lan panyeratipun mingsed dados gangsa. Piranti  gangsa ingkang umum punika kadasta : saron demung (demung), saron barung (saron), saron penerus (peking), bonang panembung, bonang barung, bonang panerus, kethuk, kenong, kempyang, kempul, gong pamungkas, gong suwukan, gendher(panerus, barung, slentem), gambang, suling, siter, rebab, kendhang(gedhe, batangan, ketipung), kecer.

            Kagem masyarakat jawa gamelan nggadahi mupangat estetika ingkang gegayutan kaliyan nilai-nilai sosial, moral lan spiritual. Kita kedah bombong nggadahi piranti kesenian tradisional gamelan. Sedaya tiyang ing donya punika percaya bilih gamelan punika piranti  musik tradisional timur ingkang saged nyarengi piranti musik barat ingkang sampun maju. Ing kahanan napa kemawon ungel gamelan saged ndamel remening manah tiyang ing masyarakat. Gamelan punika piranti kesenian ingkang luwes sanget. Ing makalah punika kula langkung ngutamakaken ngrembag kados pundi gamelan punika nggadahi mupangat kagem kesehatan jiwa saengga saged dados jamu awet nom. Kita sedaya mangertos bilih tiyang ingkang asring ngecimpumg ing karawitan, raos setiakawan  tuwuh, tutur sapa alus, tumindakipun sopan. Sajatosipun  ingkang ndadosaken saklebeting sikep-sikep punika yaiku tiyang punika nggadahi jiwa ingkang sehat, tenang, boten gampil emosi. Saking gamelan punika jiwanipun tiyang-tiyang punika saged kalatih.

            Ing raga manungsa punika wonten wirama ingkang harmonis (detak jantung, tarikan nafas, aliran darah, lan detak nadi ingkang nggadahi reruntutan ingkang mangun musik)kadosta alam semesta ingkang uga nggadahi wirama.wirama-wirama alam semesta ingkang lumebet ing raos kawujudaken dados wirama-wirama gamelan. Lumantar wirama-wirama musik kasebat manungsa nglampahi pemujaan lan perenungan spiritual. Wirama-wirama musik boten anamung dados seni, ananging dados basa jiwa, spirit kagesangan, wirama Sang Maha Pencipta, basa ingkang kapisan dados wiwitaning kagesangan. Minangka sarana lan wujud komunikasi universal, wirama-wirama musik nglumantari basa verbal, dipuntampi talingan, kalajengaken ing manah, lajeng pusatipun raos. Amerga raos menika wirama-wirama musik saged nglumantari wates-wates etnis, agama, komunitas lan negara.

             Musik gamelan (Jawa, Bali, Sunda) inggih punika salah satunggaling musik tradisional ingkang saged katampi kawontenanipun ing internasional. Miturut Prof Dr. Rahayu Supanggah  gamelan sampun kawucalaken minangka pendidikan karakter kangge lare-lare sekolah dasar ing Singapura. Malah ing Inggris gamelan dipunginakaken dados sarana terapi kagem narapidana tingkat inggil, program punika kasebat “good vibrations”. Nilai-nilai filosofi ing gamelan inggih punika nilai-nilai keharmonisan hubungan manungsa sae kanthi horisontal semenuga vertical dhumateng  Sang Maha Pencipta.